Marcoleta, sinabing humingi umano ng P20-M
INAKUSAHAN sa Sandiganbayan si Senador Rodante Marcoleta na umano’y humingi o nag-“solicit” ng P20 milyon mula sa negosyanteng si Aristotle Viray, isa sa mga donor na inuugnay sa plunder case na may kabuuang halagang P75 milyon.
Inilahad ang alegasyon ni Maria Melinda Mananghaya-Henson ng Field Investigation Bureau (FIB) ng Office of the Ombudsman sa pagdinig ng Sandiganbayan Third Division nitong Huwebes.
Si Mananghaya-Henson ang nanguna sa fact-finding investigation ng Ombudsman na naging bahagi ng paghahanda ng kaso laban kina Marcoleta, dating Rep. Mike Defensor, at mga negosyanteng sina Joseph Espiritu at Viray.
Sa kabuuang P75 milyon na tinukoy sa kaso, sinabi ng testigo na P20 milyon umano ang nagmula kay Viray.
Gayunman, hindi agad malinaw kung ang buong P20 milyon na iniugnay kay Viray ang eksaktong halagang tinutukoy sa umano’y solicitation.
Sa mga tanong ni Associate Justice Karl Miranda, chairperson ng Third Division, sinabi ni Mananghaya-Henson na nakasaad sa counter-affidavit ni Viray sa preliminary investigation ng Ombudsman na si Marcoleta umano mismo ang nanghingi ng nasabing halaga.
Ang testimonya ay iniharap sa nagpapatuloy na pagdinig sa petisyon para sa piyansa nina Marcoleta, Defensor, Espiritu at Viray.
Ang mga alegasyon ay bahagi pa lamang ng mga testimonya at ebidensiyang sinusuri ng Sandiganbayan sa pagdinig at hindi pa katumbas ng pinal na hatol sa mga akusado.
