P690K ilegal na sigarilyo naharang ng nag-papatrol na pulis sa Nueva Ecija

INARESTO ng pulisya noong Sabado ang isang drayber at ang dalawa niyang kasamahan  kung saan nakumpiska ang mga ilegal na sigarilyo na nagkakahalaga ng P690,000 sa isang operasyon ng pagpapatrolya sa Bgy. Columbitin, Cuyapo, Nueva Ecija.

Iniulat ni Nueva Ecija police director Col. Ritchie Claravall kay Police Regional Office 3 (PRO3) director Brig. Gen. Jess B. Mendez na ang mga naaresto ay sina alyas “Toto,” 59, isang drayber; at ang kanyang mga kasabwat na sina alyas “Musni,” 47; at alyas “Padua,” 18, pawang mga residente ng Cabanatuan City.

Sinabi ni Cuyapo police Chief Lt. Col. Perfecto de Mayo na ang mga pag-aresto habang nagsasagawa ng mobile patrol ang mga opisyal sa ilalim ng “Oplan Sita” sa Cuyapo-Talugtug Road.

Namataan ng mga operatiba ang isang itim na Starex van na nakaparada sa isang bakanteng lote at nagpasyang inspeksyunin ang sasakyan.

Sa pagsuri, nakita ng mga opisyal ang ilang kahon ng sigarilyo nakita sa loob ng van.

Nang tanungin ang mga ito ay bigo ang drayber na magpakita ng mga resibo o anumang dokumento na magpapatunay sa legal na transportasyon ng mga produktong sigarilyo.

Nakumpiska ng mga awtoridad ang 3 kahon ng sigarilyong "Modern Light" na may tinatayang halaga na P690,000.

Isinampa ang mga kasong paglabag sa Republic Act 8293 at Republic Act 9211 laban sa mga naarestong suspek.