2 DOH Officials, tetestigo sa kaso nina Duque, Lao

PINATETESTIGO ng Sandiganbayan nitong Lunes ang dalawang opisyal ng Department of Health (DOH) sa kasong graft laban kina dating Health Secretary Francisco Duque III at dating Budget Undersecretary Lloyd Christopher Lao kaugnay ng umano’y ilegal na paglilipat ng P41 bilyong pondo ng DOH sa Procurement Service ng Department of Budget and Management (PS-DBM) noong COVID-19 pandemic.

Pinahintulutan ng First Division ng anti-graft court sina Dawnavi Lacsado at Abegail Conchada, mga administrative officer ng procurement unit ng DOH, na humarap bilang mga testigo sa kabila ng mosyon ng depensa na huwag silang payagang tumestigo.

Maaaring makatulong ang kanilang mga testimonya upang matukoy ang kani-kanilang tungkulin sa procurement operations ng DOH at sa mga gawain ng COVAC Secretariat noong kasagsagan ng pandemya.

Inaasahan ding makapagbibigay-linaw ang kanilang mga salaysay sa lawak ng kanilang pagkakasangkot sa mga aktibidad na may kaugnayan sa procurement, gayundin sa limitasyon ng kanilang kaalaman sa mga desisyong may kinalaman sa mga polisiya na sentro ng kaso.

Gayunman, iginiit ng mga abogado ng depensa na mauulit lamang sa testimonya ng dalawang opisyal ang mga naunang pahayag ng iba pang mga testigo.

Anila, maaari rin itong lumabag sa karapatan ng mga akusado sa mabilis na paglilitis.

Iginiit naman ng prosekusyon na walang sapat na batayan sa katotohanan o batas ang agarang mosyon ng depensa na huwag payagang tumestigo ang dalawang opisyal.

Sa isinagawang cross-examination ng depensa, kinumpirma nina Lacsado at Conchada na kabilang sila sa COVID-19 Vaccination Plan (COVAC) Secretariat.

Gayunman, sinabi nilang wala silang personal na kaalaman sa mga desisyong may kinalaman sa polisiya, gaya ng kung dapat bang gamitin ng DOH ang sarili nitong procurement unit o ang PS-DBM para sa mga pangangailangan nito sa pagbili ng mga kagamitan at suplay.

Nang tanungin ng depensa kung limitado lamang sa pangangalap at pagsasama-sama ng mga dokumentong may kaugnayan sa procurement ang kanyang tungkulin, sumagot si Lacsado ng, “Hindi.”

Tinanong din si Conchada kung limitado lamang sa skeletal o pinababang bilang ng mga tauhan ang operasyon ng mga pangkat ng COVAC noong pandemya.

“Ang mga pangkat ng COVAC ay pawang nagtatrabaho,” sagot ni Conchada.

Ayon kay Conchada, unang nagsagawa ng mga pagpupulong online ang buong pangkat noong pandemya.

Gayunman, kalaunan ay binawasan ang bilang ng mga miyembrong kailangang dumalo sa bawat pagpupulong dahil sa mga problemang teknikal at pang-organisasyon, kabilang ang mahinang internet connection.

Sa pagtatapos ng pagdinig, binigyan ng korte ng karagdagang panahon ang prosekusyon upang magsumite ng compliance report na magpapaliwanag sa layunin ng pagharap ng bawat isa sa 54 na testigong nakalista nito.

Sinabi rin ng prosekusyon na isusumite nito ang mga judicial affidavit ng mga testigong balak nitong iharap limang araw bago ang susunod na pagdinig na nakatakda sa Nobyembre 9.

Kasalukuyang nakalaya sa piyansa sina Duque at Lao.

Nakatakda naman ang mga susunod na pagdinig sa kaso sa Nobyembre 23 at Enero 28, 2027.