500,000 indibidwal apektado ng lindol sa Mindanao– DSWD

AABOT sa mahigit 500,000 katao ang naapektuhan ng magnitude 7.8 na lindol na tumama sa Maasim, Sarangani noong Hunyo 8, habang lumampas na sa P84 milyon ang tulong ang naipamahagi ng gobyerno sa mga apektadong komunidad .

Ayon sa pinakahuling ulat mula sa Disaster Response Operations Monitoring and Information Center (DROMIC) Report No. 9 ng Department of Social Welfare and Development (DSWD), na inilabas noong 6 p.m. noong Biyernes, may  kabuuang 137,081 pamilya, o 553,068 indibidwal, mula sa 401 barangay sa Rehiyon IX, XI, XII, at Bangsamoro Autonomous Region in Muslim Mindanao ang naapektuhan ng malakas na lindol.

Base sa datos ng DSWD may  2,131 pamilya o 9,393 indibidwal, ang kasalukuyang nananatili sa 26 na evacuation center.

Samantala, 13,480 pamilya, o 54,274 na indibidwal naman  ang humingi ng pansamantalang tirahan kasama ang mga kamag-anak at kaibigan sa labas ng mga pasilidad na lumikas.

Patuloy na tumataas din ang bilang ng mga  napinsala sa mga residential property sa mga apektadong lugar.

Sa ulat  ng mga awtoridad may 8,865 na kabahayan ang tuluyang nawasak, habang 36,691 iba pa ang nagtamo ng bahagyang pinsala dahil sa lindol.

Aabot na rin sa P84.26 milyon kabuuang halaga ng tulong kawanggawa na ibinigay ng pambansang pamahalaan, mga lokal na yunit ng pamahalaan, at  iba pang kaugnay na ahensiya para sa mga apektadong residente.